Regionales: LibeRU in foras de su tzentru manca?

Chi Sardegna chiama Sardegna siat essida dae sa coalitzione de tzentru manca est cosa chi ischimus giai dae carchi chida. Como sa chistione pertocat a su partidu indipendentista LibeRU chi giòbia no at a pigare parte a sa mesa de sa coalitzione «aende averiguadu sa voluntade de sos partidos chi ant disinnadu sa candidadura de Alessandra Todde» de non chèrrere fàghere sas primàrias.

E como? Sos concruos de su comunicadu de su partidu non sunt galu definidos, in tantu ca no est craru ite at a fàghere Soru (chi LibeRu aiat propostu comende candidadu pro sas primàrias), posca non s’ischit comente s’ant a cumportare sos Progressistas, nen comente s’ant a mòvere sos de Sardegna chiama Sardegna. «Su traballu nostru pro sas regionales sighit pro chi nche giugamus a su parlamentu de sos sardos sa boghe de s’indipendentismu sardu, de sa manca prus genuina, de sa militàntzia pro s’ambiente, de su feminismu no istrumentale, de sa salvaguàrdia de sos deretos natzionales e sotziales de su pòpulu sardu. Sighimus a traballare pro unire totu sos sardos e sas sardas de manca».

A su presente (cunforma a sos chertos istiales cun ProgReS) non diat pàrrere possìbile una cunvergèntzia cun su “secondo polo”.

m.p.