Regionales, in campu finas Lucia Chessa cun Sardegna R-esiste

«Eris, in Corte de Apellu, in Casteddu, amus depositadu su sìmbulu de Sardigna R-Esiste. Amus a cùrrere solos in sas eletziones pro rapresentare totu sos chi non si còllocant in sas tres coalitziones: de Todde, de Soru e de Truzzu. Ca no est fàula chi in Sardigna àteru b’at: àteru pensu, àteras visiones, àteros modellos, àteras ideas, àtera coerèntzia, àtera onestade, àteros bisòngios e àteros interessos colletivos isetende de agatare rapresentàntzia in Cussìgiu e isetende de pigare forma in su panorama polìticu sardu». Est s’annùntziu de Lucia Chessa de Rossomori chi, intro sas 8 de su 22 at a presentare sa lista de sos cumpàngios suos candidados a cussigeri, e chi dae sas 8 a mesudie de su 25 s’at a presentare comente candidada a sa presidèntzia de sa Giunta regionale. In custas oras est essende a campu sa chistione de sas firmas de cussigeris de tzentru dereta pro chi sas listas de Soru non collant sas firmas in sos banchetos. Paritzos eletores lu sunt ischende como. Lucia Chessa, imbetzes, est issa etotu chi, pagas dies a como, at iscritu una lìtera aberta - pùblica - a chie si siat de sos 60 sètzidos in su parlamentu sardu (duncas finas a sos de tzentru manca) pro inghiriare custu impedimentu grae prevìdidu dae una lege eletorale antidemocràtica.