Rinnovàbiles, sos capitalistas de su bentu intre Corrasi e Ortobene

Palas eòlicas finamentas in sa badde intre Nùgoro, Ulìana e Orgòsolo. Sa comunicatzione via Pec est lòmpida chenàbura a sos tres Comunes e custu mangianu sos tres sìndigos l’ant dadu a ischire pro mèdiu de cunferèntzia de imprenta. Sa prassi de sos capitalistas de su bentu est sa matessi, est a nàrrere s’avisu cun s’invitu a sas osservatziones. E fintzas sa de sos amministradores, chi prontos ant annuntziadu sa cunvoca de unu Cussìgiu a cumone. Fintzas sa narratzione. Non semus contra a sas rinnovàbiles ma. Ma est s’alternativa chi galu mancat (e chi meresset arresonu fundudu in contu de produtzione, de distributzione e de partetzipatzione comunitària), a banda sas propostas eletorales chi faeddant de energia pùblica (fintzas Abbanoa est pùblica) a manera genèrica e chi, como mescamente, ant a colare in segundu pranu in sa carella intre Todde e Soru in contu de Tyrrenian Link.