Lodè, prantende fundos cun su progetu Silvanus

Mèrcuris su 27 de santandria, sas pitzinnas e sos pitzinnos de s'iscola segundària de s'Istitutu cumprensivu de Lodè, acumpangiados dae su personale de su CEAS Montalbo de Lodè, ant leadu parte a sa Festa de s'Àrbore in s'istatzione de Forestas in Sant'Anna (fratzione de sa bidda in tretos de su Monte Arvu). S'atzione est parte de su progetu internatzionale Silvanus finantziadu dae sa Cummissione Europea in intro de su Programa Horizon 2020. Su personale de Forestas at faeddadu a sos partetzipantes de su ruolu e de sas fainas issoro contra a sos fogos, acrarende·lis sas maneras de intervènnere cando b’at fogu e ammustrende·lis sos dispositivos de protetzione individuale (DPI) a disponimentu de su personale. A concruos de sa mangianada sos pitzinnos ant prantadu fundos tìpicos de sa magra mediterrànea. Partner de su progetu sunt su Parcu de Tepilora, Agentzia Forestas, su CFVA, sa Protetzione Tzivile Regionale, sos Comunes de Lodè, Torpè, Bitzi e Pasada e sos bator CEAS.