Còdighe nou de s’istrada. Punidu su consumu, e sena dèrogas fintzas is chi si curant

«Gran serata coi Fratelli Leghisti. Ginepro, assenzio, limoncello e ora... sereni al volante con Vasco! Liberi liberi siamo Noi!!!». Fiat su 13 de argiolas de su 2013. Su post est de su ministru Matteo Salvini. Su chi immoe nde diat bòlere tòddere sa patente pro unas cantas cosigheddas chi cherent contadas e chi non sunt mancu de pònnere a costàgiu cun sas bufadas mentovadas. Sa narratzione guvernativa pertocat pro su prus is cannones. Ma ddoe at unu “ma”. Sa norma noa, in s’artìculu 187 nou de su còdighe de s’istrada, dd’ant istèrrida pro punire chie guidat isballadu o pro punire su consumu? Sena timòria de faddire diat pàrrere sa segunda, sende chi – boghende su riferimentu a sa “alterazione psico-fisica”, su ministru non bolet chi guidet unu chi s’at pipadu agigu de erba carchi die in antis e no in sa matessi “gran serata”. Arregordemus·nos chi su consumu in Itàlia no est unu reatu ma un’illètzitu amministrativu. Immoe, cun is dispositziones noas est diferente: su chi guidat resurtende positivu a su test antidroga, mancari sìncheru e lùtzidu in cussu momentu, est commitende unu reatu. «Chiunque» podet èssere «punito con l’ammenda da € 1.500 a € 6.000 e con l’arresto da 6 mesi a 1 anno». Est bastante chi dd’agatent «alla guida dopo aver assunto sostanze stupefacenti o psicotrope», catzos suos si no est alteradu a livellu psìchicu e fìsicu. Cussu “dopo” narat totu. E si unu pigat cannabis terapèutica die cun die? A nudda ddi diat serbire su de si pigare in fatu sa prescritzione mèiga (custa chistione diat merèssere un’artìculu a banda). Como Salvini bolet una mesa tècnica pro istudiare dèrogas. Ma una mesa giai ddoe est, dae su 2021, e mai dd’ant cunvocada in antis de istèrrere is dispositziones noas.