Abba salida in sos acuìferos serentes a su mare, su 77% interessadu a concruos de sèculu

Su 2100 paret a tesu ma est in su mentres chi s’abba traballat. Semus faeddende de s’abba de su mare chi, cunforma a su chi narant sos chircadores de sa Nasa, a cando a tando at a contaminare su 77% de sos acuìferos mundiales serentes a sas costeras. Ite est su chi est cajonende su fenòmenu? Perìodos mannos de sicagna e crèschida de su livellu de su mare in primis. Ma finamentas s’urbanizatzione de sos logos de mare. Totu elementos chi lìmitant sa penetratzione de s’abba durche sutaterra e chi fatzìlitat s’intrada de s’abba salida in sas faldas. Cun cunsighèntzias mannas pro sos impreos tziviles e irrìguos. Sa cosa podet interessare fintzas nois in Sardigna. In sa mapa b'at unu pagu de ruju chi narat chi emmo.