A contos male fatos si bi torrat, ma si ruet issa ruent totus

S’annu nou de sa polìtica regionale est comintzadu lassende su bonu de is sardos interessados a sa polìtica a buca aberta. Ma galu non s’ischit si a sa presidente Alessandra Todde li tocat un’essida a manos iscutas. Ischimus chi no at nominadu mandatàriu in campagna eletorale ca nât chi no at sustènnidu gastos (o a su nessi petzi 73mìgia de M5s e de Pd), ma finamentas chi in su rendicontu imbiadu su 17 de làmpadas ddoe at 90mìgia èuros de gastos. Su chi no ischimus est àteru, comente s’at a cumportare su Cussìgiu regionale? Sa règula est latina e ladina, aut simul stabunt aut simul cadent. Est a nàrrere si ruet issa ruent totu cantos. E non sunt totus is chi sunt seguros de pòdere mantènnere sa cadrea cun eletziones noas. E cun sa matessi lege eletorale non sunt totus is chi sunt seguros de si la pòdere pigare torrende a votare.