Sant'Antoni, su 16 in Thiniscole sa prima essida de s'Orcu

In Thiniscole ddoe at giai nuscu de pistiddu e de frascas. Su 16 de custu mese ruet sa vigìlia de Sant’Antoni ‘e su ‘Ocu e, sighende is caminos de su connotu, a sero atzendent su ‘Olone, su fogulone chi unu tempus fiat de romasinu ebbia (su nùmene “ramasinu” abarrat pro sa professone de tratores de sa domìniga in antis, cando chi is cumpangias batint a bidda is frascas pro ddas ammuntonare in pratza de sa crèsia de su santu). E fintzas ocannu, in cussu pèsperu de metade de ghennàrgiu, ddoe est sa prima essita de s’Orcu de Montiarvu, sa caratza (carotza in thiniscolesu) chi nd’ant bogadu a campu dae unos cantos annos. E sunt pròpiu is de s’assòtziu de s’Orcu is chi pro su sero sunt preparende àteras fainas in pare cun àteros grupos culturales. Dae sas 5 de merie, me is cortes Sinis e Mele, is de su grupu folk La Caletta ant a èssere presentes contende su pistiddu, su durche de custu perìodu (chi su sero etotu dd’ant a cumbidare is de su prioradu); me is matessi tretos su grupu Pinna e Tinteri (nàschidu in intro de is cursos de limba sarda aprontados dae s’Ufìtziu linguìsticu) at a presentziare cun unu laboratòriu poèticu temàticu; de prus, sa chircadora Antonella Minzoni torrat a propònnere a sa bidda is fotografias e sa documentatzione de “Pro una perra ‘e pane”, mustra in contu de emigratzione cun protagonistas is traballadores locales tzucados a Bèlgiu e sa suferèntzia issoro. Cun sa prima essida de s’Orcu (acumpangiadu dae àteras caratzas) comintzat su “carrasecare anticu thiniscolesu”: peddes, caras pintadas a nieddu e ritos chi antìtzipant s’essida de s’8 de martzu, in ue a s’Orcu dd’ant a sacrificare. E serrende·dda, dae is 8 de sero de su 16, su programma previdit ballos cun su sonete de Pietro Porcu.