Sardware pùblicat AntennaPod in sardu

S’iscuadra de Sardware annuntziat sa publicatzione in sardu de su gestore de podcasts AntennaPod. "S’aplicatzione - pretzisat su comunicadu - disponìbile pro Android, permitit a is utentes de chircare podcasts, ddos sarvare e ddos ascurtare. Comente totu is programmas chi traduimus in Sardware, AntennaPod est lìberu, rispetosu de sa diversidade linguìstica e de sa riservadesa. Essende aici, AntennaPod no impreat publitzidade pro guadangiare dinare. Pro pònnere AntennaPod in sardu, depes isceti andare a Cunfiguratziones de Android> Sistema> Limbas> Limbas de su sistema".

AntennaPod no est su primu gestore de podcasts a disponimentu in sardu. Tempus a oe, Sardware at giai tradùidu su gestore Podbird pro dispositivos Ubuntu Touch, su primu sistema operativu mòbile disponìbile in sardu.

AntennaPod est a disponimentu pro dispositivos Android dae sa butega de aplicatziones Google Play e dae su repositòriu lìberu F-Droid.