Su Consillu regionali no si ndi scarescit de Rossella Urru

30 Gennaio 2012
Image
logoregione-SARDUesploso203.png

Ascurta custa nova

(S’úrtima nova) – Casteddu, 30 de su mesi de gennàrgiu - S'acuntéssia de Rossella Urru imbucat in Consillu regionali. Gióbia passau, a tres mesis e prus de su ratu de unu campu disterraus in Algeria, de sa fémina sarda e de duus collegas spagnolus, s'assembrea de bia Roma at aprovau a cuncórdiu unu documentu chi donat inditus pretzisus a su presidenti de sa Giunta regionali. Po su prus su Consillu regionali dimandat a su presidenti de sa Regioni Ugo Cappellacci de sollicitai a su Guvernu italianu a sighiri a si movi atressu de is relatzionis diplomàticas, cun totu is atzionis netzessàrias, po otèniri su liberamentu de Rossella Urru e de is àterus secuestraus. No est acabada innoi: is consilleris pedint a Cappellacci de mandai custu messàgiu a is Guvernus de totus is istadus trisinaus: "Rossella Urru est filla de una terra chi si bolit iscerai comenti terra de paxi e acasàgiu […]."In custus mesis funt stétias medas is manifestadas po pediri su liberamentu de Rossella Urru, ma in is arràdius e in is televisionis s'intendit fueddai sèmpiri de mancu de su ratu de sa fémina chi traballàt in su campu disterraus de is tribus de su desertu. Comenti at a acabai sa cosa? Ita ndi pensais bosàterus? Cun sa nova asuba de s'acontéssia de Rossella Urru cumentzat S'úrtima nova: unu progetu chi bit a su ligidori, inditendi is novas in sa fentana de is cumentus, comenti unu de is protagonistas de su giornali. Is novas annoditzàs, agoa ant essi sceberadas de sa redatzioni. Ita abetas a inditai is fatus e is avenimentus chi t'interessant de prus?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

© RIPRODUZIONE RISERVATA

S'ùrtima nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda.

Image
Regione Autonoma Sardigna

Commenti

Bella mera custa nova, mi cumplimentu cun is giornallistasa po custa ventana. Po is novasa de is diris chi eninti poita no fadeisi calincuna cosa po chistionai de su Governu nou de Monti?

Ma ita diau a Monti una nova??? Custu esti unu giornalli de sa Sardinnia, miga de s'Italia. Bella custa cosa de Rossella Urru, mischinedda cussa piciochedda... spereus chi si possada fai calincuna cosa. Deu ia a bolli a chistionai che su cussu dimoniu de sindigu de Portoscuso. E iscusaimmì meda meda ma no sciu cumenti est Portoscuso in limba nostra e d'apu iscritu in italianu.

Mi praxiri meda custu progetu nou. Mannironi est chistionendi de Portoscuso, deu olemmu inditai custa noa leggia meda chi appu liggiu in su jassu de sa Asl 7. Castiai: http://www.aslcarbonia.it/index.php?xsl=7&s=25001&v=2&c=223&t=1