“Master and Back” cinc’annus tra luxis e umbras

3 Marzo 2011
Image
logoregione-SARDUesploso3-300x112.png

Ascurta custa nova



(Chistionis e Opinionis) - Casteddu, 3 de su mes''e martzu - Po "Master and Back" est arribbada s'ora de fai bilàncius. A prus de cin'annus de sa pubblicatzioni de su primu bandu su progetu andat ainnantis tra luxis e umbras. De su 2006 funt medas is giòvanus laureaus de sa Sardigna chi ant tentu un'ocasioni de istudiu e de traballu in prus. Is primus a ddu precisai funt is promotoris de su Cumitau Master and Back, nàsciu duus annus fait po difèndiri a is interessus de is protagonistas de su progetu. "Master and Back donat un'ocasioni única po studiai, po cresci e po si cunfrontai - at precisau in d-una cuferéntzia de imprenta Arianna Onidi, una de is boxis de su Cumitau - oportunidadi chi de seguru medas de nos no iant ai tentu poita scideus beni meda cali funt is costus de is universidadis […]. Seus cuscientis de ai tentu un'oportunidadi única. Una de is pagus in totu s'Itàlia". No est sèmpiri perou chi su progetu est stetiu mandau ainnantis comenti iat a depi essi fattu. In su líbburu bessiu de pagu tempus e scritu de Pablo Sole "Master and Back. Un'inchiesta 2006-2009" si fait luxi asuba de sa gestioni de Paolo Palomba, diretori de s'Agentzia de su Traballu - enti chi guvernat a su Master and Back – Palomba est stetiu su diretori tra sa fin''e su 2006 e is primus de s'istadi de su 2009. Sèmpiri cun sa diretzioni Palomba - denunciat su giornalista de 'La Nuova Sardegna' - est stetiu ghetau a su bentu dinai meda tra consuléntzias, progetus mai fattus e notas de ispesas de foras de conca, difatis in custas notas - acrarat Sole - ddoi est de totu, de is notis in albergu de s'ex diretori a corpus de 900 eurus fintzas a arribbai a unu pacu de fóglius A4 po is apuntus, fóglius pigaus po unu cunvegnu a una cifrexedda nudda, est a nai a pagu prus de 400 eurus. Totu custu dinai pesat asuba de is pabas de is contribuentis". Immoi Master and Back parrit in crisi po mori ca no ddoi est prus dinai. Sa filosofia de su progetu est cussa de finantziai a s'imparu mannu de istudiantis e traballadoris in sa penísula e a foras de istadu cun master, dotoraus e ammaistramentus (is úrtimus, est a nai is ammaistramentus, funt stetius liaus de su bandu de su 2010) totu custu iat a depi serbiri a fai intrai is giòvanus in su mundu de su traballu sardu (aziendhas, entis púbblicus, universidadis) atressu de cussu chi est su caminu de su Back. In su 2010 s'acàpiu tra su caminu de andada a foras de sa Sardigna e sa torrada in s'Ísula no est prus bellu meda comenti 'e primu. Po finantziai a is pagu prus de 2.500 Back iant a serbiri 60 millionis de eurus in duus annus. A oi invecis ddoi funt po totu su Master and Back, est a nai po su caminu a foras de sa Sardigna e po cussu in s'Ísula, scéti 40 millionis de eurus in totu, e depint bastai fintzas a su 2013. "De is 110 millionis de eurus chi ddoi ant essi depius essi po su progetu - at ammentau su Diretori nou de s'Agentzia de su Traballu Stefano Tunis - sa bellesa de 60 funt stetius spendius in su 2009, cun d-una delíbbera aprovada a tres diris de is eletzionis regionalis". Dinai chi iat permitiu - po su bandu de su 2009 - a 1800 personis de participai a su progetu. Cun is 13 millionis de eurus de su 2010 su progetu chi in is annus passaus furiat unu bellu progetu oi parrit unu progeteddu de pagu contu. Sa cosa iat a cambiai chi s'agatat su dinai chi iat a depi trasformai in realidadi su documentu aprovau de su Consillu regionali su 12 de su mes''e gennàrgiu.Su scritu pedit a sa Giunta regionali de donai àterus cincu millionis de eurus po "fai participai (a su Master and Back, ndr) unu númeru de beneficiàriusparis a cussus de is annus passaus". Comenti at a acabbai sa cosa? Ita ndi pensais bosàterus?

Scàrriga custa nova

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

© RIPRODUZIONE RISERVATA

Chistionis e opinionis

Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda

Commenti

Oi oi gei seus postus beni...si punt bocendi de diri in diri. Custu parriat un progeteddu bellu meda, ma cantu parrit est un'atra illusioni. Faint sempri de aici si donant unu arroghededdu de pani e si ndi ddu liant de mala chinta

Scusaimmì meda si no sciu scriri beni su sardu commenti cussusu chi scrinti in su Minuto. Deu ollia nai ca non mi meravigliada po nudda custa cosa de Palomba... dognia orta chi eusu domandau de chistionai cun issu non fiada mai presenti in Agenzia...
E perou deppeusu acciungi puru un'atra cosa a custa bella analisi de su giornalli: olleusu chistionai de su vattu ca s'annu passau, a pagu tempusu de is elezionisi procincialisi cun d'unu corpu sceti sa giunta de centru-destra adi donai su dinai po tottus id dimandasa presentadas po su Master and back e custa cosa esti stetia fatta puru po is 700 o prusu borsasu de "Giovani Ricercatori"? Si da depiausu aspettai custa vini: e chini esti sa Regioni Sardigna, Onassis?

"Ghetau a su bentu dinai meda tra consuléntzias, progetus mai fattus e notas de ispesas de foras de conca". Calincunu si deppiri diaderus bregungiai.