In sa Mem de Casteddu sa Die mundiale de sa ràdiu

Oe, dae sas 10 de mangianu a sas 6 de merie in sa Mem - Mediateca del Mediterraneo de carrera de Mameli, Casteddu tzèlebrat sa Die mundiale de sa ràdiu. Sa Die l'at istituida s'Unesco su 2011 e ocannu su tema at a èssere “Ràdiu e paghe”. A s’initziativa casteddaja, organizada dae s’assessoradu comunale de sa Cultura, bi partètzipant sas emitentes sardas Radiolina, Radio Sintony, Radio Suxsound, Radio X, Radio Sant’Elena e Unica Radio. «Est sa prima bia chi su Comunu de Casteddu – narat s’esponente de sa Giunta Truzzu, Maria Dolores Picciau - organizat un'eventu interessende e ponende paris sas ràdios tzitadinas. E cosa de importu est a lis reconnòschere su ruolu issoro in s'informatzione, in s'educatzione e in sa valorizatzione de sas culturas locales». In programma diretas radiofònicas, dj set e intervistas.

M.P.