Epilessia, cras s’Open day in Tàtari

Torrat, a pustis de duos annos de stop pro more de sa pandemia, s’Open day tataresu contra a s’epilessia, mègius connota in Sardigna comente male caducu.

S’apuntamentu est programmadu pro cras, mèrcuris su 22 dae sas 9 a sas 18 in su tzentru de Neuropsichiatria infantile de s’Aou e at a èssere s’ocasione pro sas primas bìsitas e sos esames istrumentales, in prus de frunire informatziones in contu de patologias epilèticas.

In Sardigna sunt belle 12mìgia sas persones interessadas e prus de sa metade sunt patzientes chi nde sufrint in edade evolutiva.

«S’epilessia – narat sa dotora Susanna Casellato, responsàbile de su tzentru parte de Neuropsichiatria –, est una maladia neurològica intre sas prus comunes in s’edade se sa crèschida e tenet grados diferentes de gravidade».

In ocasione de s’Open day, su tzentru at a fàghere registratziones eletroentzefalogràficas pro sa maladia epiletica, finas suspetada, e primas bìsitas a pustis de àere pagadu su ticket (pro custu cussigiant de cuntatare in antis su 079 229322).

Lìbera s’intrada pro su puntu informativu.

M.P.