Prèmiu Otieri, sos cumponimentos pro sa de 65 editziones intro su 31 de maju

B’at galu carchi die pro poder pigare parte a sa de sessantaghimbe editziones de su Prèmiu Otieri.

Su cuncursu literàriu nòdidu, nàschidu su 1956 gràtzias a s’atza de su fundadore e primu segretàriu Toninu Ledda, si torrat a presentare cun sa fòrmula rodada de sas tres setziones dedicadas a sa paràula creativa in limba sarda, gadduresa, turritana, aligheresa e tabarchina.

Sa prima, intitulada a su linguista Antoni Sanna, est pensada pro sa “Poesia sarda” iscrita, in rima o mancu, cun argumentu lìberu (lìmite ùnicu su de sos 40 versos); sa segunda, “Prosa sarda”, chi leat su nùmene de su fundadore illustre de su Prèmiu, pertocat sos contos, non pius longos de chimbe pàginas A4 (corpus 12 e 2 centìmetros de oru); sa de tres, “Tra poesia e càntigu” in onore de s’improvisadore Antoni Cubeddu, est sa chi aunit sos versos a su cantu poèticu tìpicu de sa traditzione sarda («nìnnidos, atìtidos, glossas, cantadas in lira, gosos, cantones torradas, modas, modellos, mutos, repentinas etc.»).

Sos iscritores, chi an a poder partecipare a totu sas setziones (cun unu cumponimentu ebbia in ognuna), an a dever imbiare su materiale issoro inèditu e mai premiadu o mentzionadu non pius a tardu de su 31 de maju.

Sas òperas an a poder esser imbiadas via mail a s’indiritzu info@premiozieri.it (inditende sa setzione in s’ogetu de su messàgiu) o impreende sa posta traditzionale (cun sa setzione inditada in sa busta) cun s’imbiu de sa còpia a s’indiritzu “Segreteria de su Prèmiu Otieri de Literadura Sarda Via Ugo La Malfa, 28 – 07014 Ozieri (SS)”.

Sos testos cheren iscritos a màchina o cun su computer e deven inditare sas generalidades de s’autore (nùmene e sambenadu, data e logu de nàschida, indiritzu fìsicu e eletrònicu e cuntatos telefònicos). No an a esser ammissas poesias e contos anònimos o cun pseudònimos. An a èssere imbetzes de agiudu pagas rigas biogràficas e sa tradutzione in italianu (in alternativa unu glossàriu de sas peràulas pius pagu connotas).

Sa giuria chi at a esaminare sos cumponimentos l’at a ghiare su Prof. Dino Manca acumpagnadu, finas ocannu, dae sa vicepresidente Anna Cristina Serra e dae sos giurados