Movimentu Master & Back: "Bolleus tempus certus po sa pubblicazioni de is bandus po is back e is tirocinius"

(IlMinuto) - Casteddu, 3 de su mes''e austu - Tempus segurus po sa pubblicazioni de is bandus Master and Back 2009 po is back e is tirocinius. Est cantu ant dimandau a sa Giunta regionali is rappresentantis de su movimentu Master & Back cun d'una conferènzia stampa convocada custu mangianu in su Caffè delle Arti, in Casteddu. Cras a is 18.00 is "masterizzandi" ant a tenniri s'occasioni de espòniri is arrexionis insoru a fac''e sa "Commissione Politiche comunitarie" de su Consillu regionali. Sa pubblicazioni de su bandu, annunziada po sa fini de su 2008, s'est tenta, scéti parzialmenti, in su principiu de su mes''e argiolas. S'"Agenzia regionale del Lavoro" - si podit liggiri in is documentus presentaus de su movimentu - iat annunziau cantu sighidi cun d'una mail spedia su 19 de totussantus: "Su bandu nou de Master and Back at essi pubblicau cun meda probabilidadi no prus a tradu de sa fini de su 2008". S'avvisu pubblicu po s'Alta Formazione esti stetiu pubblicau scéti su 7 de su mes''e argiolas. No dd'est notizia po is tirocinius, is back e po sa formazioni artistica post-lauream.
"In calincunu casu - narat Mario Gottardi de su movimentu - funti stetius refudaus aterus traballus, poitta seus stetius bloccaus de sa tanti disigiada pubblicazioni de su bandu, sa vida de custa genti esti stetia condizionada de su ritardu de custu bandu". Totu custu at fattu oltrepassai a genti meda s'edadi massima po podi presentai sa domanda po s'Alta Formazione: 35 annus. Po custu su movimentu Master & Back dimandat de aumentai de un'annu su limiti d'edadi po podi partecipai a su bandu po is tirocinius e a s'avvisu nou po s'Alta Formazione annunziau de sa Giunta in attòngiu.