Concertus: suzzessu po sa primu edizioni de Brothers of Rock

(IlMinuto) - Casteddu, 4 de su mes''e cabudanni - Cincu nous iscrittus a su registru de su "midollo osseo". Est custu su risultau prus importanti de Brothers of Rock, su primu memorial "Luca & Bobo". Po totu sa serada de mèrcuris 2 de su mes''e cabudanni is immaginis de is fradis Chiarelli in su "schermo" de su Corto Maltese ant accumpangiau sa musica de is band, chi esti stetia interrumpia scéti de is interventus de Gianfranco Tintis de s'Admo de Cuartu Sant'Alèni e de sa dottoressa Adriana Vacca de su Ctmo. Tintis e Vacca ant chistionau de is ultimus progressus de sa sciénzia in su campu de is trapiantus de "midollo": un'operazioni chi podit fai sanai finas a s'80 po centus de is malàdius de talassemia. Immoi, su trapiantu podit essi fattu puru cun d'una tecnica de prelievu de sànguni particolari.
Sa musica at allirgau sa serada de is circa 400 presentis. Ant obertu sa serada is Brothers of Rock - sa band formada de calincunu amigu de Luca e Bobo - cun  is cover de is Deep Purple, de is Iron Maiden, de is Queen e de is Black Sabbath. Is Baa-Bà de Rossella Faa ant portau is presentis aintru a unu mundu de "istorias, rezzettas, e pregadorias... fattas comenti una canzoni", tra sonus brasilianus e testus in campidanesu. "Shine on you crazy diamond" esti stetia sa punta prus alta de s'esibizioni de is Us and Them, cover band de is Pink Floyd. Ospiti appreziau de sa manifestazioni esti stetiu Joe Perrino, chi at fattu unu branu acusticu meda intensu. Ant serrau sa serada is Rtp acoustic ensemble, cun d'un'ammesturu de ska, reggae e jazz. Immoi s'apuntamentu est po su 2010, cun sa segunda edizioni de Brothers of Rock.