Marina Cafe Noir 2009: de su 10 a su 13 de su mes''e cabudanni sa cittadi e is quarteris tra emigrazionis, frontieras e accoglienzia

(IlMinuto) - Casteddu, 9 de su mes''e cabudanni - "Ospiti della città": est custu su tema e s'istrada maista de sa VII edizioni de Marina Cafè Noir (10-13 de su mes''e cabudanni), su festival de letteraturas applicadas chi si tenit dogn'annu in s'istoricu quarteri de Casteddu. Unu quarteri multietnicu, aundi s'accoglienzia si mostrat in medas valoris. S'edizioni 2009 de su festival sighit quattru percursus parallelus: is eventus de "Ospiti della città", s'ispaziu dedicau a is prus giòvanus cun Baby Cappuccino, su programma Café Geographique e is mostras. "Cussa de sa cittadi" - spiegat Giacomo Casti - esti sempri stetia una fissazioni nostra. In custa edizioni eus boffiu cumprèndiri comenti una cittadi podit fai bon'acatu a is proprius abbitantis: cittadinus de diversas cittadis". Su tema de s'accoglienzia s'acapiat a dòppiu filu a cussu de is frontieras e a cussu de sa figura de s'emigrau. A sa chistioni est dedicada, tra is aterus apuntamentus, sa mostra "Frontiere, migranti, rifugiati" de Philippe Rekacewicz, geògrafu e giornalista de "Le Monde Diplomatique": ant essi esponnias 20 cartas (120 per 160 cm) chi esplorant is relazionis tra is frontieras e is emigrazionis internazionalis. At essi donada attenzioni puru a is "frontieras" tra is quarteris istoricus, cun pensamentus e contus de is diveras zonas de sa cittadi. Biddanoa at essi, faendi scéti un'esèmpiu, su centru de s'ispettaculu de is Baa-bà de Rossella Faa e de Paoletta Dessì. Ddoi ant essi puru momentus dedicaus a Demetrio Stratos - a 30 annus de sa morti -, a Ugo Dessy, a Giuseppe Dessì e a unu maistu importantissimu de su noir, Leo Malet. "Su noir no est unu circùitu universali - concludit Casti - ma sighit a essi un'ullera meda interessanti po contai sa soziedadi".

Castia su programma cumpletu: www.marinacafenoir.it