Is pregadorias e is rezzettas de is Baa-bà de Rossella in su Marina Café Noir

(IlMinuto) – Casteddu, 14 de su mes''e cabudanni - Esti stetia arricchia de sa musica de Rosella Faa e de is Baa-bà s'ùltima serada de Marina Café Noir 2009. In d'un'edizioni chi at boffiu "allargai su festival a is quarteris istoricus de sa cittadi", s'artista de Masùddas at presentau cun sa solita ironia calincunu aspettu de sa vida in Bidanoa, su quarteri aundi bivit de meda tempus e chi de pagu est assaltau de is sprecas e de is topis de dognia mannaria e colori. "Torraus a restituiri a Biddanoa sa propriu dignidadi", si podit liggiri in su cartellu preparau de Paoletta Dessì e appiccau a palas de is musicistas, in prazza San Sepolcro. A su tema de s'invasioni de is topis is Baa-bà ant a dedicai, tra pagu tempus, unu branu scrittu de chini est de sa "parti de su tortu": is topis. Rossella Faa - accumpangiada de Giacomo Deiana a sa ghitarra e de Nicola Cossu a su contrabassu - at presentau calincunu de is branus de su primu liburu-cd "Baa-bà. Istorias, rezzettas e pregadorias fattas a canzoni", cd chi no s'agat prus poitta spaciau. Pregadorias po amori rivolgias a Santa Fillumena ("Ta bellu su dominigu") e a Nostra Signora 'e sa cos'e pappai in "Malloredus cun bagna". "Aiaia mia santu 'Idesa"- dedicada a is millas isolas, puru linguisticas, in s'Isola - at postu in risaltu is bellissimus intreccius tra ghitarra e contrabassu. At serrau s'ispettaculu una surpresa "Ciccaia cumpangia", branu pigau de su primu cd "In corde".