Master and Back: nascit su Comitau "uffiziali"

(IlMinuto) – Casteddu, 15 de su mes''e ledaminis - "Èssiri unu puntu de riferimentu e de rappresentazia uffiziali po is beneficiarius e po totus cussus chi funt interessaus a partecipai a su programma": funt custus is obbiettivus de is promotoris de su Comitau Master and Back, chi s'est costituiu su 10 de su mes''e ledaminis passau in sa sala de is confèrenzias de su "Centro Giovani" de via Dante, in Casteddu. "Po evitai chi si torrint a ripitiri incomprensionis e chistionis - si podit liggiri in d'una nota - su Comitau at a fai de interlocutori uffiziali in is relazionis chi is prossimas bortas ant essi intrattenias cun is entis cumpetentis e cun is rappresentantis insoru, comenti s'"Agenzia regionale per il Lavoro" e sa Presidenza de sa Regioni Sardigna, po sa gestioni de su programma e po facilitai aicci sa comunicazioni reciproca". Su Comitau at puru eligiu noi rappresentantis chi ant a tenni su compitu de rappresentai in dognia sedi is partecipantis a su programma".