Su no a su nucleari calat in prazza. Domìnigu in Casteddu e Borgo Sabotino sa manifestazioni promòvia de Siamovivi

(IlMinuto) - Casteddu, 22 de su mes''e ledaminis - Calat in prazza su no a sa costruzioni de is centralis nuclearis noas in Italia boffia de su Guvernu e approvada cun sa lei "de isviluppu" de su mes''e argiolas passau. Su movimentu 'Siamovivi' at organizzau po domìnigu 25 de su mes''e ledaminis una manifestazioni contra a s'intrada de nou de s'energia atomica. Sa manifestazioni s'at a tenni contemporaneamenti in Casteddu e in Monte Sabotino, in provinzia de Latina, de is 10 a is 14. "Biu ca su Guvernu - si podit liggiri in su comunicau stampa de s'associazioni - at dezìdiu de introdusiri unu nucleari considerau bècciu e pagu econòmicu, e massimu est andau contra a sa dezisioni chi su populu italianu at pigau cun su referendum de su 1987, Siamovivi at fattu de su cuntrastu a custa politica de maccus su fini principali de cuss''e totu. A sa manifestazioni, organizzada de su "movimentu de aggregazioni popolari" nàsciu in Internet ant a partizipai Luciano Burderi, professori de Astrofisica de s'Universidadi de Casteddu, Claudia Zuncheddu, consilleri regionali de is Rossomori, su Meetup 31 Cagliari e su Cagliari Social Forum.