Allagamentus: "Operazione fiumi" de Legambiente arribbat in Cabudèrra, in s'arriu San Girolamo, a un'annu de su disastru

(IlMinuto) – Casteddu, 10 de su mes''e totussantus - Arribbat in Sardigna "Operazione fiumi", sa campagna nazionali de Legambiente e de su Dipartimentu de sa Protezioni civili dedicada a sa prevenzioni de is smuronamentus e de is allagamentus. S'iniziativa si firmat oi in Cabudèrra po sensibilizzai is cittadinus e is istudiantis in materia de arriscus idrogeologicus. A pustis de su controllu fattu totu su mangianu in is zonas colpias de s'allagamentu cun is piciocus de s'"Istituto Sergio Atzeni", at a sighiri a su merì unu seminàriu-dibattidu (15.30, Casa Melis) cun sa partecipazioni de su sindigu de Cabudèrra, Giorgio Marongiu, de Giuseppe Delogu de su "Corpo Forestale", de geolugus e de ricercatoris. In is ultimus mesis, cun "Operazione fiumi", chi fait s'ùltima sosta de su tour in Sardigna, is attivistas de Legambiente ant monitorau - comenti si podit liggiri in d'una nota de s'Ufficiu stampa - "is attividadis chi prus de 5milla comunus a arriscu idrogeologicu ant postu in campu po sa seguresa de is cittadinus e de su territoriu contra a is smuronamentus e a is allagamentus". Is risultaus de su monitoraggiu, arregortus in su dossier "Ecosistema rischio", ant essi ammostaus cras in Casteddu.