Dossier "Ecosistema rischio 2009": perigulu de smuronamentu e allagamentu in s'82 po centu de is comunus de sa Sardigna

(IlMinuto) - Casteddu, 12 de su mes''e totussantus - In s'82 po centu de is comunus ddoi funt zonas habitadas chi arriscant smuronamentus e allagamentus. Ddu dinunziat su dossier "Ecosistema rischio 2009" presentau in Casteddu de Legambiente a sa fini de sa campagna nazionali "Operazione Fiumi 2009". Is númerus de su dossier disignant unu quadru chi preoccupat: cussu sadru est unu territoriu meda delicau, aundi in medas zonas est presenti su perigulu de allagamentus o de smuronamentus e s'11 po centu de is comunus est considerau "ad alto rischio idrogeologico". Legambiente citat, po fai un'esèmpiu, su Campidanu de Casteddu - cun sa zona tra su Flumini Mannu e su Cixerri e is comunus de Su Masu, Assèmini, Sestu, Muristènis e Cabudèrra -, s'Ogiastra - cun Gàiru, Osini e Biddamànna Istrisaili - e ancora Bosa e sa valli de is fluminis Cedrino e Posada. Nonostanti is disgrazias de is ùltimus annus - dinunziat su dossier - funt ancora pagus (scéti su 18 po centu de is abitazionis) is iniziativas po sa "delocalizzazione" de is domus costruias in is zonas prus arriscadas.