Nues: de 26 a su 30 de su mes''e totussantus in Casteddu su Festival de is fumettus de su Mediterraneu

(IlMinuto) – Casteddu, 11 de su mes''e totussantus - Cincu diris a s'insigna de is "nuis chi fueddant" de gióbia 26 a lùnis 30 de su mes''e totussantus, Casteddu aghillit sa segunda edizioni de Nues, su festival dedicau a is fumettus e a is cartonis animaus de su Mediterraneu. In programma mostras, convegnus, proiezionis e seminarius chi ant a agatai domu in duus diversus ispazius de su cuarteri Marina: s'ex "Liceo Artistico" e s'Hostel Marina. Pensau de Bepi Vigna, unu de is "babbus" de Nathan Never (s'eroi fortunau de is edizionis Bonelli), su festival ponit in campu una proposta ambiziosa: cussa de s'afidai a istriscias e cartoons po fai conòsciri is ateras culturas. Aicci, a pustis de ai approfondiu in sa primu edizioni - chi s'est tenta s'annu passau in Nùgoro - sa produzioni de su fumettu grecu, Nues ocannu est dedicau a s'ex Yugoslavia. Imbasciadori de custu càmbiu at essi su serbu Aleksandar Zograf (classi 1963), disignadori meda appreziau in Italia po is "Lettere dalla Serbia”, contus po figuras chi chistionant de is bombardamentus de sa Nato de su 1999 , bombardamentus chi ant colpiu is proprius logus de origini. Po Nues su disignadori at a presentai “Appunti” (sabudu 28 de su mes''e totussantus a is 18.30 in su Caffé Savoia), is proprias istorias tradúsias in italianu. Calincuna tavola originali de Zograf at essi esposta in "“Nuvole Balcaniche”, sa mostra allestia a s'Hostel Marina chi proponit puru is operas de is autoris de Stripburger, s'importanti rivista slovena de fumettus.