Presonis: "mandau un'àtera borta" in Nùgoro su presoneri chi pedit su trasferimentu in Puglia po abarrai acanta de su fillu malàdiu

17 Mese de idas 2009
(IlMinuto) – Casteddu, 17 de su mes''e de paschixèdda -"Est scéti una tontesa meda grai de sa burocrazia cussa chi impedit a Giandonato Sciacovelli de otèniri su trasferimentu in d'unu presoni de sa Puglia, sa regioni aundi risiedit sa família e aundi bivit su fillu con d'una maladia genetica chi est arribbada a s'ùltimu stadiu e chi est impeurendi sempiri de prus. Trasferiu po sa millesima borta in Tarantu po unu processu, seguru de podi passai ingunis assumancu is diris de paschixèdda abetendi sa cunfirma definitiva, dd'est in veci tocada sa sorti de torrai a contoniai in Bad’e Carros. Sa torrada in Nùgoro aparessit meda sconcada biu ca tra prus de unu mesi su presoneri depit torrai a passai su Tirrenu po un'udiénzia noa". Est cantu narat cun d'una nota Maria Grazia Caligaris, presidenti de s'associazioni "Socialismo Diritti Riforme". S'esponenti socialista at prus de una bia dinunziau su casu a su "Garante dei Detenuti" de Nùgoro Carlo Murgia, a su diretori de s'Istitutu Gabriella Incollu e a su "Capo del Dipartimento dell’Amministrazione Penitenziaria". "In acontéssias comenti custas, documentadas cun certificaus médicus e cun cundizionis de clara nezessidadi, no est po nudda claru poita si depat sperdíziai su dinai pùbblicu. Su trasferimentu definitivu de Sciacovelli in Puglia est doverosu. S'aggravamentu de sa saludi de su fillu, chi tenit sa sindrome de Marfan, fait parri meda apretosa sa presénzia de su babbu presoneri de prus de úndix'annus, noi de custus passaus in su presoni de Nùgoro. Su presoneri s'agatat difatis in Bad’e Carros aundi est iscontendi sa pena definitiva a 30 annus de presoni". "Sciacovelli – arregordat Caligaris - puru calencunu mesi fait furiat stetiu trasferiu po motivus de giustízia in Tarantu, aundi, grazias a s'interventu de su responsàbbili de su Dap Franco Ionta, iat fattu is primus esaminus de compatibbilitadi nezessarius po un'eventuali trapiantu de mueddu, importanti po agiudai su fillu Francesco, afidau a is serbìzius sozialis de su Comunu de Bari. Totu perou esti stetiu blocau po mori de sa torrada de Sciacovelli in su presoni de Nùgoro".
© RIPRODUZIONE RISERVATA
Tags