Vinyls: sa produzioni no torrat a partiri. Rudas: "Senz''e unu tentativu de su Guvernu cun s'Eni sa chímica est condannada a sa morti"

(IlMinuto) - Casteddu, 19 de su mes''e gennargiu - In sa Vinyls de Pòrtu Turre sa produzioni no at a podi torrai a partiri primu de unu mesi. Est cantu est beniu a foras de s'atóbiu de ariseru in Roma tra s'azienda, s'Eni, su Guvernu e is sindacaus de categoria. "Cun dispraxeri no funt arribbadas is noas chi bolliaus - si podit liggiri in d'una nota de sa Filcem Cgil - e abbarrat unu stadu meda forti de incertesa po su futuru de sa Vinyls. Ddoi funt cuatru compradoris possíbbilis, su prus certu parrit sa 'compagnia petrolifera' de su Qatar Ramco". Su segretariu de sa Cgil de Tàtari, Antonio Rudas, esti stetiu meda aspru. "Tocat a dda finiri cun custa cumédiedda. Senz''e un'interessamentu forti e claru de parti de su Guvernu a sa responsabilidadi de s'Eni - narat su sindacalista - sa chímica est condannada a sa morti. Pensu ca siat nezzessariu arziai su tiru de sa protesta, perou primu tocat a si fai un'azaminu de cuscénzia de ainturu e totu".