Greenpeace: "Arriscu disastru ambientali in is "Bocche di Bonifacio". Prestigiacomo no at fattu nudda po difèndiri s'area"

(IlMinuto) – Casteddu, 23 de su mes''e fiàrgiu - "Su scontru scampau de una navi "cargo" in sa zona de su Parcu nazionali de s'arcipelagu de Sa Madalèna cumprovat ancora una borta ca s'arriscu de un'imminenti disastru ambientali ammalezat is 'Bocche di Bonifacio'. Est cantu afirmat cun d'una nota Giorgia Monti, responsàbbili de sa campagna "Mare" de Greenpeace. "Funt mesis - spiegat - ca, impari a is comunidadis de su territoriu, pedeus a su ministru Prestigiacomo de fai calincuna cosa po difèndiri cust'area. Nudda est ancora stetiu fattu". In is "Bocche di Bonifacio" - dinunziat s'organizzazioni ambientalista - passant dogn'annu prus de tre milla navis "cargo", de custas su dexi po centu acarrigiant sustàntias perigulosas. In su mes''e cabudanni un'imbasciada de síndigus de sa Sardigna de tramuntana si furiat presantada cun Greenpeace in su ministeru de s'"Ambiente" po portai un'apellu chi pediat agiudus de difesa apretosus e sérius.
"Nonostanti sa Direzioni generali - si podit liggiri in d'una nota - si fessat impignada a s'ocupai de sa chistioni, sa proposta po s'inserimentu de su 'stretto' in s'elencu de is 'Aree Marine Particolarmente Sensibili (PSSA)' est ancora atesu".


Po ndi sciri de prus:
http://www.ilminuto.info/ricerca.php?ricerca=greenpeace

S'apellu firmau in sa Rainbow Warrior:
http://www.greenpeace.org/raw/content/italy/ufficiostampa/file/sindaci-appello-bonifacio