Sa Provìnzia de su Campidanu de Mesu afestat "S'annu internazionali de sa biodiversidadi"

(IlMinuto) – Casteddu, 8 marzu - Sa Provìnzia de su Campidanu de Mesu afestat "S'annu internazionali de sa biodiversidadi" cun d'un'atóbiu meda mannu aprontau po su 27 e po su 28 de su mes''e marzu in s'ex burgu de Gennas. In cust'eventu ddoi ant essi is rapresentantis de is comunus de s'Italia, de  sa Francia e de sa Germania chi ant addiriu a s'eventu "Le Città del Bio". "Cussu de su Campidanu de Mesu - si podit ligiri in d'una nota - est su primu fueddu de sa Sardigna po sa tutela e s'avaloramentu de is ecosistemas. Sa variedadi de sa vida est a sa basi de su benèsseri economicu e soziali nostru e at essi sempiri de prus una risorsa necessària in sa lota contra a su cambiamentu de su clima". A is traballus ant a chistionai unus cantu maistus univesitarius, is espertus de s'Agenzia Laore e su Presidenti de sa "Città del Bio", Marcello Mazzù. At essi ammostau puru su contribbutu de sa Provìnzia de su Campidanu de Mesu in sa difesa de sa biodiversidadi: "Vivere la campagna", definiu cun d'una nota "unu progetu po ammanniai su pesu de sa Sardigna in sa globalizazioni".