"S'amministrazioni de su comunu de Pula no bollit s'arti". Sa dinúnzia de Luca Fadda, istudianti de fotografia

(IlMinuto) - Casteddu, 4 de su mes''e marzu - "In Pula s'arti no dda bollint".  Cumenzat cun custus fueddus sa nota chi Luca Fadda, istudianti de fotografia e "nebodi de su Presidenti de sa Cunfraria de Pula", at iscrittu po protestai contra a sa mancànzia de atenzioni de parti de s'amministrazioni de su comunu po sa proposta chi cuss''e totu at fattu e, a pàrriri suu, po totu s'arti.
"Apu mandau - iscririt - una  lítera e unu fax lassendi su númeru de su telèfunu miu a is assessoris nostrus Angelo Tolu e Augusto Porceddu po propòniri de fai una mostra de fotografias in is diris de Sant'Efis, senz''e pediri nisciunu finanziamentu". Fadda proponit de fai una mostra cun una parti de is fotografias de s'edizioni 2009 de sa Sagra.
"Apu puru pediu - narat s'istudianti de fotografia - de oberri sa mostra cun is relàtas de un'istudiosu de istoria e de su Presidenti de sa Cunfraria po podi ispiegai e contai a totus sa festa de Sant'Efis, una cosa chi interessat a chini bivit in Pula e a is turistas".
"A oi - finit - a pustis de cuatru diris, no m'ant nemmancu mandau un'arrespusta ne po mail ne po fax e no m'ant nemmancu telefonau po chistionai de sa proposta".