Chernobyl day: sit in contra a sa morti nucleari a pustis de 24 annus de sa destrossa

(IlMinuto) – Casteddu, 22 arbili - "Sì alla vita e no alla morte nucleare". Cun custu slogan, a 24 annus giustus giustus de su dannu nucleari chi iat trumentau cussa chi insaras furiat s'Unioni Sovietica e totu su mundu, su comitau No Nuke "Una risata sardonica vi sepellirà" at aprontau un'àtera diri de apellu contra a su fàbbricu de una centrali nucleari in s'Isola.
S'apuntamentu est po lùnis 26 de su mes''e arbili in prazza Carmine (17.00), in Casteddu.
A sa cosa, aprontada po "nai no a is centralis nuclearis e a is depósitus de is ferrinas fillas de su balossímini de calincuna ànima de malu coru", ant addiriu numerosas associazionis, sindacaus e formazionis políticas. Sa serada at essi oberta de unu dibbàtidu cun sa participazioni de Bustianu Cumpostu, responsàbbili de sa proposta po su referendum nucleari, e de Luciano Burderi, físicu. Ant essi protagonistas de sa cosa puru sa poesia de Paola Alcioni e sa música e is fueddus de su cantautori Francesco Madau.
Funt inbitaus a participai - acrarant is aprontadoris - "totus cussus e totus cussas chi bollint costruiri e chi bollint lotai po sa soverania territoriali, sa libbertadi de circustànzias perigulosas e chi bollint agiudai sa produzioni de energia pulia chi no istropiat su logu".