Circustànzia de is Giordi: un'ateru pagheddu de tempus po si salvai de s'isbarazu. Flore: "Bincit sa solidariedadi. Ausenzia de is políticus"

(IlMinuto) – Casteddu, 14 de su mes''e arbili - Bitória noa de sa solidariedadi in Santu Juanni Sruexu. Ariseru a mangianu su pichetu fattu de unu grupixeddu de ànimas, de su praidi de sa bidda e de is militantis de s'Irs e de Sardigna Natzione at agiudau is Giordi a otèniri un'atera pròroga, a su 29 de su mes''e làmpadas, po s'isbarazu forzau de sa família de sa domu in via Is Sannas, isbarazzu programmau po su 13 de su mes''e arbili. "Bincit sa solidariedadi", cummentat Mario Flore, defensori incansàbbili de sa causa de sa família surcitana. "Scideus meda beni - precisat in d'una nota in Facebook - ca no podeus cantai bitória, ma est seguru ca si ndi podeus fai bantu, nosu chi ddoi furiaus impari a totu cussus chi diaderus no funt possius benni, nosu si podeus fai bantu de custa bitória. Comenti sempiri is políticus no si funt fattus biri, poita cussus, si scit beni, si presentant, fadendusì biri aundi ddoi est genti meda".
"Po custus politicheddus - sighit Flore - in s'istoria trista de sa família Giordi no ddoi est cabbali no ddoi est torracontu. Nesciunu políticu s'est fattu biri a su pichetu, nemmancu tra cussus de sa bidda".
Sa domu de sa família Giordi - posta in bendida a s'asta po mori de is dépidus de s'azienda de família - esti stetia pigada po pagu migliaja de eurus.
Is Giordi - babbu in carrozina a pustis de un'ictus a conca, mamma e filla senz''e traballu, su fillu prus piticu istudianti - immoi funt circhendi de torrai a pigai sa domu atressu de un'arregorta de dinai e faendi recursu a una finanziaria.
De sa bitória de ariseru - concluit Flore - "nosu, is presentis eus imparau ca sa solidariedadi est meda importanti e ca unius e cumpatus si bincit. Isperu ca intru su 29 de su mes''e làmpadas s'agatit sa soluzioni po custu dramma. Comentisiollat siat sa família Giordi no at essi scaréscia e at a podi contai in sa solidariedadi de amigu berus".