"Mai più soli": su progetu de Sdr po is presoneris de sa colónia penali de Isili

(IlMinuto) - Casteddu, 12 de su mes''e arbili - Arrespundi a is bisóngius de is personas chi no tenint sa libbertadi, chi no podint tenni sa famíglia acanta po afrontai is bisóngius  primarjus de sa vita insoru, comenti si sciacuai e si bistiri. Nascit cun cust'iscopu su progetu "mai più soli", un'idea po is presoneris prus poberus de sa colónia penali de Isili.
Su progetu de s'associazioni "Socialismo Diritti e Riforme" - agiudada de s'Assessorau de is "Politiche Sociali" de sa Provìnzia de Casteddu - at a diventai una realidadi cras a is 12.00 in sa Colónia penali, cun sa cunsigna de calincunu prodotu po si sciacuai e sabonis po puliri bistiris e localis.
"In d'unu momentu audi si pensat scéti a nosu 'e totu - narat sa presidenti de Sdr, Maria Grazia Caligaris - est necessàriu nudriai a sa cultura de s'atenzioni po is personas chi no staint beni. Pèrdiri su diritu a sa libbertadi po un'errori fattu no bollit nai ca si depat renunziài a s'isperu de una vida mellus".
S'ocasioni - si ligit in d'una nota - at a donai sa possibbilidadi de chistionai de sa "custodia attenuata" de sa colónia de Isili chi, nàscia in s'Otuxentus, donat a is presoneris sa possibbilidadi de traballai in foras, traballai sa terra de is campus e atendi is brebeis in d'unu terrenu mannu 750 ètarus.