Gelmini no passat s'esàminu de s'assembrea de s'Universidadi de Casteddu. "Cun sa riforma est a arriscu su diritu a s'istudiu"

(IlMinuto) – Casteddu, 21 de su mes''e maju - S'Universidadi de Casteddu bullat su ministru Gelmini. S'assembrea únia de s'Ateneu sadru - atobiada ariseru a mangianu in s'àula magna de sa Facoltadi de "Ingegneria" - at difatis aprovau una mozioni únia chi dimandat mudíficas a su provedimentu presentau de s'esponenti de su Guvernu Berlusconi.
"Su Parlamentu - si ligit in su documentu - depit pigai in cunsidériu is críticas e is propostas arribbadas de totus is Ateneus e de cusseguénzia depit cambiai su testu de su disignu de lei Gelmini aprovau de sa 'Commissione Istruzione' de su Senau".
A sa cosa ant participau "totus is costas de s'Ateneu": maistus, istudiantis, personali amministrativu e istudiosus, chi sa mozioni definit "tocaus in modu meda grai de sa riforma".
S'assembrea at arrefudau prusatotu sa lógica de su "costu zeru" chi "torrat fatu fatu e cun frimmesa in su testu de su provedimentu".
"Cun custu critériu - si ligit in su documentu - si mandant in miséria is ateneus púbblicus, no s'avalorat sa ricerca, si cundennat su diritu a s'istudiu".
"Dúbbius mannus - at cummentau su Retori Guido Melis - benint puru de su sitema de acabidamentu, mèntris su tema de su diritu a s'istudiu no benit nemmancu pigau in cunsidériu".