"Gig e Amici Terra": "Sa Regioni bendit 'bículus' de is Salinas de Carluforti. Su pranu de recúperu ambientali arriscat"

(IlMinuto) – Casteddu, 3 de su mes''e maju - "Sa Regioni autónoma de sa Sardigna bollit bendi 'bículus' de is Salinas de Carluforti" ponendi in perígulu su pranu de recúperu de s'area. Est cantu denunciant cun d'un'única nota su "Gruppo d'intervento giuridico e gli Amici della Terra". Tra is benis in béndida postus in órdini in s'XI Programma de "Dismissione" chi at tentu s'aprou de sa Giunta regionali - precisant is duas associazionis ambientalistas - ddoi funt difatis unu palazu e unu capannoni de is Salinas de Carluforti. Duas istruturas - acrarant - "importantis po su cumprimentu de un'interventu de recúperu ambientali de is Salinas" a òpera de su Comunu.
"S'insertamentu de is duus fàbbricus chi faint parti de su cumpéndiu de is Salinas tra cussus chi si podint cèdiri - acrarant "Gig e Amici della Terra" - parrit unu sceberu unu pagu macu: est beni chi su Comunu de Carluforti si fazat intendi debressi in Regioni".
"Su recúperu ambientali de is Salinas, difatis, podit essi un'importanti passu ainnantis po sa gestioni "sostenibile" de unu beru e própriu scrusórgiu naturalisticu e istoricu".
Atesu pagu centinas de metrus de su centru de sa bidda, is Salinas de Carluforti - no prus in motu de meda annus - cun su tempus si funt trasformadas in d'unu logu perfetu po aghilliri numerosas arrazas de pillonis de àcua, tra custus ddoi est sa Gentarrúbia, su Cau corsu, su Zuruliu de àcua e su Sabateri.

Po ndi sciri de prus: http://gruppodinterventogiuridico.blog.tiscali.it/