Universidadi: in Casteddu ocupazioni de su Retorau po nai no a su dinai liau de sa Riforma Gelmini. Melis: "Tenint arrexoni"

(IlMinuto) – Casteddu, 19 de su mes''e maju - Totu s'Universidadi s'arrebbellat a sa Riforma Gelmini. Ariseru a merì in Casteddu istudiantis e istudiosus ant ocupau simbolicamenti su Retorau e oi ddoi funt diversus pianus in àterus ateneus de Italia: Tor Vergata, Siena, Firenzi, Pisa.
"Cundividu is apinnicus espressaus de istudiosus e istudiantis - at nau su retori de s'Universidadi de Casteddu Giovanni Melis - in méritu a su disignu de lei Gelmini: no creu siat possíbbili riformai s'Universidadi proponendi comenti únicu istrumentu cussu de ndi liai su dinai".
Is irminorigamentus a su personali e a is finanziamentus decidius de sa lei 180/2008 e su blocu a s'imparamentu fattu de is istudiosus - iat nau a sa fin''e su mes''e marzu su Senau académicu casteddaiu - "funt faendi diventai is cosas sèmpiri prus difícilis. Difícili est garentiri su normali funzionamentu de is ateneus".
"Si bollint ignorantis - si podit ligi in d'unu documentu de su Cordinamentu istudiantis de s'ateneu casteddaiu - bollint fai sperèssiri sa cultura, bollint su totali controllu de s'informazioni e duncas bollint is concas nostras. E ci funt casi arrennescius".
"Serbit s'agiudu de sa classi política", at precisau su retori. "De pagu - at nau - apu deu 'e totu manifestau dúbbius mannus po totu custu puru in sa Commissioni Cultura de sa Càmara de is deputaus e in calencunu documentu mandau a sa classi política sadra".