Karate: bitória po Matta e Piludu in s'VIII memorial "Anedda"

(IlMinuto) - Casteddu, 7 de su mes''e làmpadas - Perfezioni de su movimentu, resa de sa ténnica e fuliesa. Funt custas is cosas chi ant portau Luca Matta e Massimo Piludu a binci s'VIII memorial de karate "Luciano Anedda - Insieme per la solidarietà" (30 de su mes''e maju, Sìnnia, Centru sportivu Sant'Elena) in sa gara dópia de difesa personali e de kata a iscuadras (formas aprontadas de primu). Is duus campionis giòvuneddus (chi funt giai stetius medàllias de oru in su Mundiali de Manchester de su 2008) ant bintu contra a is àteras otu cópias in gara, cun d'un'ispetàculu de karate shotokan aprontau cun sa guida de su maistu Alberto Fogu (chi cun Alberto Piludu guidat de casi un'annu s'istóricu Karate club Kanazawa de Cuartu Sant'Alèni) e unu Nijyushiho perfetu.
Segundhu postu po Francesco Marongiu e Daniele Piras (goju Ayasa). Ancora shotokan po su terzu (Mauro Corongiu e Salvatore Cogoni) e su cuartu postu (Alessandro Piludu e Simone Cogoni).
S'incassu de su memorial Anedda - aprontau, comenti dogn'annu de su maistu Tebaldo Salis - at essi totu donau po fai òperas de beni. In su kata individuali si depint arregodai is bitórias de Alessandro Piludu (12-16 annus), de Massimo Piludu (16-23 annus), is medàllias de prata de Luca Matta (16-23 annus) e de Rosmari Machado (tra is prus mannus de 23 annus) e su terzu postu de Mauro Corongiu (sèmpiri tra is prus mannus de 23 annus).

Càstia sa difesa personali de  L. Matta e M. Piludu:

http://www.youtube.com/watch?v=d3GKlqkOW_k

Càstia su kata  ("Nijyushiho, 24 passi") de  L. Matta e M. Piludu:

http://www.youtube.com/watch?v=HWKo48T8qHo&feature=related