Música po sa Palestina: in tremilla in Casteddu ant nau no a s'imbargu israelianu de sa Striscia de Gaza

(IlMinuto) – Casteddu, 7 de su mes''e làmpadas - Sa Palestina est prus acanta. Sàbudu passau, in Casteddu, funti stetias casi 3milla is personas chi ant assistìu a su concertu de solidariedadi cun su pópulu palestinesu. A sa cosa, aprontada de s'Assóziu "Amicizia Sardegna Palestina", ant participau duas tra is band prus connotas de su panorama musicali indipendenti in Sardigna: Dr. Drer & Crc Posse (rap e reggae de Casteddu) e Tzoku (grupu de Thiniscòle nàsciu de calincunu de is mermus de is Kenze Neke). Asuba de su palcu de su terraprenu de viale Regina Elena, is duas band ant presentau is próprius album nous in d'una "festa benefit" po su pópulu de sa Striscia de Gaza chi s'agatat strecau de s'assédiu israelianu.
Su dinai arregortu in sa 'festa' esti stetiu donau totu a sa popolazioni trumentada de s'imbargu israelianu e de annus e annus de ocupazioni. "Po s'eventu - si ligit in d'una nota de imprenta - ddoi esti stetiu puru unu collegamentu telefonicu de Gaza cun Vittorio Arrigoni, chi at poziu informai in deretura sa genti de totus is progetus internazionalis chi si funt tenendi po segai s'arrocamentu. Arrigoni at fueddau puru de su pesu políticu chi tenit e at a tenni ancora s'atacu terroristicu israelianu a sa nai de is paxiosus po s'area mediorientali".
Po s'eventu ddoi furiant puru numerosus banchixeddus de is diversus assózius e de is diversus movimentus de basi po s'àcua púbblica e po sa boicotadura de s'economia israeliana.