Santa Lucia: recursu europeu po salvai su pinedu de su Burgu. 6milla firmas narant no a su Puc de Thiniscòle

(IlMinuto) - Casteddu, 25 de su mes''e làmpadas - Sa mobilitazioni po salvai su pinedu de Santa Lucia, in Thiniscòle, arribbat in Europa. Calincuna cida fait su "Gruppo di intervento giuridico", is "Amici della Terra" e su "Comitato Salviamo Santa Lucia" ant difatis mandau su recursu a sa Commissioni europea contra a su Puc aprovau de s'amministrazioni de su centru in Provìnzia de Nùgoro, chi - nonostanti is mudíficas fattas - sighit a previdiri su sciúsciu de su pinedu chi s'agatat ingíriu ingíriu de su Burgu.
"S'Amministrazioni comunali de Thiniscòle - narant is promotoris de su recursu - at aprovau s'istrumentu necessàriu de programazioni e gestioni urbanistica de su mantessi territoriu in ausenzia de su prozedimentu preventivu e chi ponit allazus de V.A.S. (Valutazione ambientale strategica, ndr)".
Su Comunu de Thiniscòle at in veci espressau s'intenzioni de portai ainnantis su V.A.S. "a pustis de sa segunda adotadura comunali", critériu - afirmant is promotoris de su recursu - "cun craresa pagu lícitu e, comentisiollat, a oi ancora frimmu".
Abetendi un'arraspusta de s'Europa sighit comentisiollat s'atividadi de su "Comitato Salviamo Santa Lucia": finzas a immoi funt difatis prus de 6milla is personas chi ant firmau sa dimanda popolari contra a s'isperdíziu de su pinedu.