Calagononi s'incrubat a sa mannària de Django Reinhardt. Cumenzat sa XIII edizioni de su Jazz Festival

(IlMinuto) - Casteddu, 23 de su mes''e argiòlas - In su centenàriu de sa nàscida de su gypsy jazz su Festival de Calagononi s'incrubat a sa mannària de Django Reinhardt.

De su 28 a su 31 de su mes''e argiòlas, arribbat puntuali s'apuntamentu aprontau e nàsciu de una bidea de s'assóziu culturali "L’Intermezzo", dedicau ocannu a su jazz gitanu. In is cuatru diris de su "Calagonone Jazz Festival" 12 ant essi is concertus a s'insigna de sa grandu música. Puru ocannu, difatis, s'apuntamentu si presentat comenti una rassigna chi proponit a is jazzofilus - si ligit in su comunicau de imprenta - "un'oferta originali e si andaus a biri, única, si castiaus a totus is festival aghillius in s'istadi in Itàlia".

S'at a cumenzai mérculis 28 de su mes''e argiòlas, a is 18.00, in is giardinus de "Villa Ticca", cun sa música de su The Rosenberg Trio (Stochelo Rosenberg ghitarra ritimica - Nonnie Rosenberg contrabbassu), ispetàculu-pròlogu de su concertu chi is tres fradibis olandesus de s'ànima e de su sound gipsy ant a tenni a is 21.30 in su teatru Comunali de Calagononi. Ant a serrai sa festa is The Tolga Trio (Tolga Emil During - ghitarra solista; Lorenzo Lucci - ghitarra ritimica; Alessandro Lo Mele contrabbassu).

Grandu música puru in Drugàli, aundi su 29 de su mes''e argiòlas s'at a afestai s'identidadi musicali de s'Ísula cun is intèrpretis suus prus afacetaus e rivoluzionarius: is musicistas Ignazio Francesco Spano, Ignazio Alberto Zucca, Giulio Pala, Efisio Zuddas, Gianfranco Meloni, chi ant a animai s'apuntamentu "Launeddas per Django". S'ispetàculu at a preparai su púbblicu de su "Calagonone jazz" po s'apuntamentu clou, su ballitu "Django", produzioni originali de "L'Intermezzo", chi at a biri sa presénzia de is ballarincus de su "Teatro della Scala" e at a andai in iscena a is 21.00 in is aposentus de su Teatru comunali.