"Le mani che guardano, le mani che leggono". In Casteddu sa butega de s'apalpu ispirada a s'òpera de Munari

(IlMinuto) - Casteddu, 6 de su mes''e argiòlas - Tenit comenti títulu "Tutti i sensi del racconto ... Le mani che guardano, le mani che leggono" sa butega de s'apalpu dedicada a is pipius chi tenint de is 4 a is 11 annus ispirada a is esperiénzias artisticas de Bruno Munari, artista e designer italianu de su XX séculu autori de is "Libri illegibili".
Sa butega nàscia grazias a una bidea de su Sistema Bibbliotecàriu Comunali de Casteddu, at a cumenzai oi a is 17.30 in sa Bibblioteca de Quarteri "Regina Elena".
"Sa butega 'plurisensoriale' - si ligit in d'una nota - est unu logu aundi is pipius podint manixai medas materialis cun diversas caraterísticas cromaticas, termicas, de pesu e de forma e aundi ant essi agiudaus a ddas a ponni impari po imparai a connosci is próprius sensazionis". Iscopu de su progetu est acumpangiai is pipius in s'iscoberta de un'istoria chi sighit su discursu visivu e de apalpu.