Antropologia: de s'11 a su 17 de su mes''e cabudanni in Nùgoro s'at a tenni su "Video Workshop" cun David e Judith MacDougall

(IlMinuto) - Casteddu, 30 de su mes''e austu - S'Istitutu Superiori Etnograficu de sa Sardigna aprontat in Nùgoro unu "Video Workshop" cun David e Judith MacDougall, registas-etnografus de fama internatzionali. S'apuntamentu - si ligit in d'una nota - "est po personas cun pagu o cun nesciuna esperiéntzia, chi tengant su disígiu de usai s'istrumentu audiovisivu po progetus de ricerca chi s'ant a bolli fai in su tempus benidori". Is letzionis, chi s'ant a tenni de s'11 a su 17 de su mes''e cabudanni in sa sedi de s'Isre, previdint imparamentus pràticus de basi chi ant a ammostai s'usu de su videu e discussionis teóricas asuba 'e cuss''e totu in s'ambitu de is ricercas e in cussu de is publicatzionis de antropologia e de is matérias de s'area. Su Workshop est obertu a tous is laureaus.

David e Judith MacDougall, de su Centre for Cross-Cultural Research de s'Australian National University, ant fattu pagu prus de 25 film etnograficus. Is MacDougall ant maturau un'esperiéntzia manna in s'imparamentu de is ténnicas videocinematograficas in Australia, in is Stadus Unius, Norvegia, India e Cina. Tra is últimus film a essi premiaus arregordaus: "Photo Wallahs", "Tempus de Baristas" (produtzioni Isre), "Diya", "The Age of Reason", "The Art of Regret", "SchoolScape" e "Gandhi's Children".