Relatu Goletta Verde 2010. Meda grai s'impestadura de is foxis de is ses arrius. "Sa reza po depurai est ancora mancanti"

(IlMinuto) – Casteddu, 9 de su mes''e austu - Cun 35 logus premiaus de sa Guida Blu de Legambiente e Touring Club sa Sardigna si cunfirmat "reina de is àcuas límpias".
Is datus presentaus in is diris passadas in Terranòa de sa "Goletta Verde" de Legambiente ant difatis arremaciau su stadu de saludi bellu meda de su mari e de is costeras sadras.
Po unu tretu de 1.731 chilómitrus de costeras sadras funt scéti seti, tra foxis de arrius, arrieddus e canabis, is puntus acastiaus chi ant svelau un'impestadura a foras de is límitis de lei.
Is foxis acusadas funt cussas de Rio Foxi, Rio Foddeddu, Rio Mannu, Coghinas, Rio Thiniscòle e de s'arrieddu chi arribbat a s'Arenàrgiu de s'Isuledda in Santu Tiadòru (area interessada de unu guastu momentaneu a sa reza de is fognas giai arrangiadas), totus impestadas in modu grai. Ddoi est su mantessi stadu de imbrutamentu puru po su canabi in s'Arenàrgiu 'San Giovanni' in su comunu de S'Alighera.
"Si castiendi a s'istérrida de is costeras sadras is datus chi funt bessius a foras de s'acastiamentu de 'Goletta Verde' podint essi cunsideraus totus impari positivus - acrarat sa responsàbbili de 'Goletta Verde' Serena Carpentieri - is ses foxis e su canabi impestaus funt s'indicu de una reza ancora mancanti, prusatotu in is areas de s'internu. Su stadu de su serbíziu de pulidura regionali arribbat scéti a su 68 po centu de sa genti chi ddoi bivit, lassendi iscobertus 535milla citadinus".