Crisi Epolis. Isfratu po sa redatzioni de Casteddu. Assostampa sarda: "Cosa meda grai. Azienda foressia"

(IlMinuto) – Casteddu, 10 de su mes''e cabudanni – A casi ses annus de sa primu bessida de su "Giornale di Sardegna" si fait sèmpiri prus difícili s'acuntéssia de su grupu E Polis. Ariseru a mangianu su cummissàriu s'est presentau in sa sedi de viale Trieste in Casteddu e at donau su dispàciu a sa redatzioni. Is computer de is giornalistas (cun totu is datus fissaus) funti stetius pigaus de is scrianias impari a totu su materiali de sa redatzioni, totu ainnantis de is ogus de is traballantis in assembrea permanenti po difèndiri su postu de traballu.

Ddu denunciat s'Assótziu de imprenta sarda, chi "bit meda grai cantu est acuntéssiu".

"A sa mancada pubblicatzioni de is 19 giornali E Polis - si ligit in d'una nota fatta connosci de su sindacau de is giornalistas sardus - si aciungit immoi su dispàciu de is istrumentus de traballu, senz''e nesciuna resisténtzia de parti de un'aziendha chi no pagat cussu chi depit e de tempus meda forexida. Su sindacau de is giornalistas fait apellu a sa magistradura, a is fortzas política e istitutzionalis a manera chi cun sensu de responsabbilidadi no agiudint a aggravai un'acuntéssia gia meda grai chi corpit a su coru de is medas boxis de s'informatzioni".

Sa Cgil puntat su didu asuba de s'editori. "A pustis de is promissas fattas asuba de is sacrificius de is traballantis - afirmat su segretàriu regionali Enzo Costa - sa propriedadi si depit pigai sa responsabbilidadi de si fai ainnantis cun fattus cuncretus e cun su dinai di modu de garentiri su traballu.