“PulArchàios”: sighit finzas a su 3 de su mes''e ledamini su ciclu de apuntamentus po chistionai de su situ archeologicu de Nora

(IlMinuto) - Casteddu, 17 de su mes''e cabudanni - "PulArchàios", sa rassigna de atóbius collegaus a su situ archeológicu de Nora, arribbat ocannu a sa VI editzioni. Su progetu culturali at a durai fintzas a domínigu 3 de su mes''e ledàminis de su 2010. Su programma est arricu de apuntamentus. Medas is momentus de imparu, is bisitas guidadas a sa "Torre del Coltellazzo", e is cunvegnus, chi ant a tocai a is argumentus prus diversus: de is mosàicus de Nora (23 de su mes''e cabudanni, a is 20.00) a su foru romanu (24 de su mes''e cabudanni, a is 20.00), a s'"Innovazione tecnologica nello studio e nell’analisi della musica per launeddas" (2 de su mes''e ledàmini, a is 19.00).

Sa fibera de is apuntamentus est aprontada de su Comunu de Pula, cun s'agiudu de is Dipartimentus de Archeologia de is Universidadis de Genova, Milanu, Padova e Viterbu, de sa Soprintendenza Archeologica de is Províncias de Casteddu e Aristanis, de s'Assessorau a sa Cultura de sa Província de Casteddu e de su Ministeru po is "Beni e le Attività Culturali".