Lota de is pastoris. Mps sighit s’ocupatzioni de su Consillu. Zuncheddu (Rm): “Su dinai ddoi est: su stadu italianu si depit 1,6 milliardus

(IlMinuto) – Casteddu, 26 de su mes''e ledàminis - "Su Movimentu pastoris, chi ocupat de una cida sa saba de sa Cummissioni "Bilancio" de su Consillu regionali de sa Sardigna in Casteddu, at decídiu de fai acabbai s'ocupatzioni, scéti a pustis de s'atóbiu cun is 'meris' programmau po cras martis 26". Ddoi furiat scritu aici in su comunicau fattu connosci de Mps in su merì de ariseru, aici esti stetiu. Biu s'auséntzia de disponibilidadi de is capus de su grupu de su Pdl a atobiai a sa delegatzioni de su "Movimento Pastori Sardi" primu de si ndi andai de sa Cummissioni "Bilancio", Felice Floris at annunciau - chi no ddoi funt novidadis - s'ocupatzioni at a sighiri e s'at a fai puru sa manifestada. Asuba de sa Chistioni at fueddau puru Claudia Zuncheddu, presidenti e consilleri regionali de is Rossomori. "Cun is manifestadas de custus mesis in totu s'Ísula e cun s'ocupatzioni de s'àula de sa Cummissioni 'Bilancio' – acrarat sa sardista de sinistra - su 'Movimento Pastori Sardi' no dimandat sa limúsina ma su diritu a traballai in is impresas insoru po evitai su fallimentu e garentiri su sustentamentu a is próprius famílias". "S'economia agro-pastorali sarda - precisat Zuncheddu - no podit essi sacrificada in s'altari de 's'auséntzia de su dinai', candu su Stadu Italianu depit a sa Sardigna unu milliardu e sescentus millionis de eurus scéti cun sa contienda de is Intradas".