Traballantis Geos ancora asuba de sa cabertura de s'istatzioni de Casteddu: ferruvia a arriscu paràlisi. Sa solidariedadi de aMpI: "Fadeus su Partidu de is Traballadoris Sardus"

(IlMinuto) – Casteddu, 25 de su mes''e ledàminis - Funt 104 is traballantis de sa Geas - dita de apaltu de su Grupu Manzoni chi si ocupat de s'allichidimentu de is vagonis de is trenus - chi no arricint su stipendiu de mesis. De mérculis passau unu grupu de operàjus at ocupau su terratzu de s'Istatzioni de is Ferruvias de su Stadu de Casteddu, in bia Roma, pedint su pagamentu de is arretraus. De oi sa firmada de is serbítzius de s'aziendha est portendi a sa partziali paràlisi de sa retza ferruviaria sarda (funt giai 13 is cursas annulladas custu mangianu).

A is traballantis de sa Geas est arribbada sa solidariedadi de a Manca pro s’Indipendentzia. Is traballantis - scririt su diretivu políticu de aMpI - "no arricint su stipendiu po mori de un'abbétiu tra Geas e Trenitalia chi si passant de s'unu a s'àteru sa responsabbilidadi. Custu est su modellu de sa Sardigna coloniali chi bit is traballantis de totus is cumpartus scéti comenti s'última arroda de su carru, traballantis chi no tenit boxi in sa gestioni política de su poteri". A Manca fait una proposta po donai sbucadura política a is diversas contiendas de is últimus annus. "Sa lota de is pastoris, sa destrossa de s'iscola e de is ferruvias, s'abbandonu de biddas e biddas, sa destrossa de s'artesanau, su belamentu de dógnia atividadi industriali acapiada a is risorsas nostras e su morri morri de cussa importada e filla de su colonialismu s'ant imparau ca est necessàriu fai de debressi a costruiri su sugetu políticu de is traballadoris sardus". "Si no eus essi capacis de cumentzai debressi sa costrutzioni de su Partidu de is Traballadoris Sardus - concluit aMpI - custus ant a sighiri a s'agatai cun is pabas a su muru, vitimas de s'arrecatu fissu de is mecanisimus de su colonialismu italianu".