Brothers of Rock II: domínigu e Cuartu su memorial Luca&Bobo 2010. Obertas is iscritzionis a su registru donadoris mueddu de s'ossu

(IlMinuto) – Casteddu, 23 de su mes''e totussantus - Est tempus de Brothers of Rock. S'editzioni 2010 de su memorial dedicau a Luca e Bobo Chiarelli s'at a tenni domínigu 28 de su mes''e totussantus in s'Fbi de Quartu Sant'Aleni (bia Brigata Sassari 68) a cumetzai de is 21.00. In su 2009 s'eventu at permitiu de arregolli casi 30 iscritus nous a su registru de is donadoris de su mueddu de s'ossu. Fortuna chi is aprontadoris sperant de torrai a arripiti, e superai, puru ocannu. Sa donatzioni, cun ténnicas delicadas, donat sa possibbilidadi difatis de sanai fintzas a s'80 po centu de is talassemicus. Aici comenti teniant s'Anemia mediterranea Luca e Bobo: "Piciocus miríficus - custus is fueddus impitaus de is amigus po ammentai a is duus fradis cun d'un'amori po su rock atacadinu - senz''e issus oi no iaus a essi cussu chi seus". Protagonistas de su merì - aprontau cun s'agiudu de s'Admo e de Tea Onlus - ant essi sa mimória, sa música, s'amigàntzia e sa solidariedadi. A obèrriri su concertu at essi su british rock de is SoftLoud, autoris de s'album de èsordiu, meda cunsiderau "A placet o hide". Ant a sighiri is Raudi, cover band chi at a presentai unu sceberu de branus de ótimu hard rock. Ancora rock forti e metal po is Brothers of Rock – su grupu formau de unus cantu de amigus de is fradis Chiarelli - chi at a sonai una fibera de branus de band istoricas: Deep Purple, Black Sabbath e Iron Maiden.

A ingíriu de is 22.30 ant essi is Signs of life a gloriai su púbblicu cun sa presentada de calencuna perella de su repertóriu smesurau de is Pink Floyd. A is atmosferas de sa band de Roger Waters e David Gilmour at a sighiri su special guest de su merì: Joe Perrino, su rocker sardu chi at de pagu donau vida a su Cd "Canzoni di malavita". Su concertu at a sighiri cun su rock italianu de is Var e cun blues rock chi pigat su coru de is Toni Negri. Is performance ant essi frimadas dógnia tanti de is relatus de is médicus e de is volonteris de s'Admo chi ant a fueddai de is últimus progressus de sa sciéntzia in matéria de trapiàntu de mueddu. Puru ocannu at possíbbili a s'iscriri a su registru de is donadoris.

S'intrada est a oferta líbbera.