"Disterraus Sardus": de medas annus furriadroxu online po is sardus in su mundu

(IlMinuto) – Casteddu, 11 de su mes''e totussantus - "Custu giassu web est dedicau a sa terra mia e a is emigraus suu". Aici Beppe Mantega, fillu de su disterru sardu in Torinu, descrit su giassu Disterraus sardus, de medas annus  furriadroxu po is sardus chi funt a forsa de s'Ísula. Un'istrumentu de informatzioni meda importanti arricu de novas, links e filamus chi fueddant de sa Sardigna, de su disterru e no scéti, su giassu donat meda atentzioni a is fatus de su mundu 'e su traballu. "Est dedicau - acrarat su curadori de su giassu - prusatotu a fradi miu Gianfranco, una de is medas vitimas de su traballu de custu logu mancau, eternamenti guvernau e amministrau [...] de berus e próprius 'ciaparatt'". Su giassu at consighiu un'importu meda mannu candu no ddoi funt prus stetias pubbricatas, puru in Internet, de su 'Messaggero Sardo' (Giunta Soru, ndr), arribbendi a pigai su postu de un'istrumentu chi sa Regioni iat sceberau de ndi liai, puru si temporaneamenti. "EmigrauSardus -acrarat Mantega in sa presentada online de Disterraus - est tra is pagus giassus web dedicaus a su disterru sardu chi ant assegurau un'atentzioni de no pagu contu a is novas de su mundu de su disterru sardu in d'unu períodu de 'mudesa a sa marolla' de su 'Messaggero', mudesa filla de s'ausèntzia de is finantziamentus púbblicus".