“Su tempus benidori no si tocàt”. Istudiantis e pastoris impari in Casteddu po nai no a sa Gelmini

17 Onniasantu 2010
Image
manifestazione_studenti_pastori.jpg


(IlMinuto) – Casteddu, 17 de su mes''e totussantus - "Istudiantis e pastoris unius in sa lota. Su tempus benidori no si tocàt". Esti stetiu custu unu de is slogan tzerriaus custu mangianu in Casteddu de is pagu prus de 800 personis - medas giovuneddus - chi ant atraversau is bias de Casteddu in ocasioni de sa Diri mundialli po su Diritu a s'istudiu. In su corteu de is istudiantis, cumentzau de pratza Garibaldi po arribbai in bia Roma, s'est unia a metadi 'e camminu una delegatzioni manna de su "Movimento Pastori Sardi". Su motivu est simpli. "Puru is fillus de is pastoris funt istudiantis - at acrarau un'allevadori Mps a IlMinuto - e isfilant in is manifestadas nostras. Nos cumprendeus ca sa riforma de su Guvernu fait a arrogus s'Universidadi e is fillus nostrus cumprendìnt beni chi, si su lati at a sighiri a essi pagau a 60 centésimus no iaus a tenni su dinai po ddus fai istudiai". Sa lota de is pastoris - at cunfirmau Felice Floris - at a sighiri cenàbara chi benit cun d'unu presidiu a fac''e sa Saras de Sarròccu.Novidadis puru de sa giustítzia: su processu a is tres pastoris frimmaus su 19 de su mes''e passau a pustis de sa càrriga de sa Politzia esti stetiu rinviau a su 9 de su mes''e paschixèdda.

A sa manifestada de oi ant pigau parti puru delegatzionis de su cordinamentu precàrius de s'iscola de Casteddu, de su Sindacau de basi Usb e de sa "Federazione della Sinistra" e de sa Cgil.



© RIPRODUZIONE RISERVATA