Concertus: in Tàtari Annu nou cun Daniele Sepe e sa Brigada internazionale

27 Mese de idas 2010
Image
brigata_internazionale-150x150.jpg


(IlMinuto) – Casteddu, 27 de su mes''e paschixèdda - "Sa pàtria nostra est su mundu intreu", narat unu cantu anàrchicu. Est custu su díciu chi afestat a sa música de sa Brigada Internazionale dirigia de Daniele Sepe, su sassofonista e cumponidori napoletanu bincidori in su 1995 de su Prémiu "Lo straniero". Cun su mantessi leit motiv, s'orchestra multietnica at a alligrai su noti de annu nou de sa citadi de Tàtari, aundi po s'ocasioni undixi de is dexeseti artistas de s'ensamble ant a artziai asuba de su palcu chi at a benni allestiu in pratza de Itàlia.

"Abetendi sa rivolutzioni manna - si podit ligi in d'una nota de imprenta - sa Brigada Internazionale portat in giru sa música mirífica de sa genti prus pobera de sa terra. E ddu fait in alligria. Po dispetu". In su noti tra su 31 de su mes''e paschixèdda e s'1 de su mes''e gennàrgiu, su centru turritanu at a arrembombai cun is medas abbratzus musicalis, serbendusì de sonus chi benint de sa Bosnia, de s'Argentina, de sa Svezia, de Cuba, de sa Romania, de su Brasili, de su Senegal, de s'Algeria e de s'Itàlia. Una festa manna de sonus ammesturaus comenti arrespusta a s'intolleràntzia, "de su reselu po su diversu, de is rundhas citadinas, de is esercitus in is istradas". Contra a totu custu sa Brigada Internazionale no at abarrai frimma e muda, poita - scririt Daniele sepe - "mudus no bolleus abarrai".



© RIPRODUZIONE RISERVATA
Tags