Presonis: Annino Mele, 27 annus de presoni senz''e connosci oi s'"acontéssia giudiziaria sua". Sa dinúntzia de "Socialismo diritti riforme"

(IlMinuto) – Casteddu, 6 de su mes''e paschixèdda - " A Annino Mele no scéti benit negada de dex'annus sa possibbilidadi de atobiai a s'antziana mamma, ma no arrennescit oi nemmancua  connosci a cali puntu est s'acontéssia giudiziaria sua". Ddu dencunciat cun d'una nota Maria Grazia Caligaris, presidenti de s'Assótziu Socialismo Diritti e Riforme. Sa rapresentanti socialista fait connosci ita ddoi est scritu in d'una lítera-dinúntzia mandada de su presoneri de Mamujada a Sdr. Mele, cundennau a s'ergàstulu, e presoneri de su 1987 e chi  oi est inserrau in su presoni de Fossombrone. Sa dimanda de connosci cun precisioni a ita puntu est s'acontéssia sua, mandada a su Magistrau de Guardiania de Ancona in su mes''e làmpadas, no at tentu ancora arrespusta. "Custu - precisat Caligaris - est in cuntrastu cun su princípiu de sa rieducatzioni de sa pena decretau de sa Costitutzioni e de sa lei asuba de s'ordinamentu de is presonis". "A pustis de 34 annus de presonia, 27 giai scontaus in presoni, ap'a tenni - si dimandat Annino Mele – assumancu su diritu de connosci cali cunditzioni giudutziaria tengu oi? Si in veci no est aici poita calencunu no mi ddu narat cun craresa? No connosci su própriu status est aguali a negai calisisiat oportunidadi de podi tenni unu permissu o pofintzas de fai una dimandedda po unu collóchiu".